មិនរួចខ្លួនទេ! នគរបាលជំនាញ កំពុងស្រាវជ្រាវរកជនបង្កបាញ់ ៣គ្រាប់ កាលពីយប់ម៉ិញ

មិនរួចខ្លួនទេ! នគរបាលជំនាញ កំពុងស្រាវជ្រាវរកជនបង្កបាញ់ ៣គ្រាប់ កាលពីយប់ម៉ិញ

 

កម្លាំងនគរបាលជំនាញ កំពុងស្រាវជ្រាវកំណត់មុខសញ្ញា ជនបង្កដែលបានបាញ់ចំនួន ៣គ្រាប់ បណ្ដាលឲ្យជនរងគ្រោះរងរបួសធ្ងន់ កាលពីយប់មិញនេះ បើតាមប្រសាសន៍លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ ប្រាប់អោយដឹងថា  នៅព្រឹកថ្ងៃទី ១៧ ខែធ្នូនេះថា ករណីផ្ទុះអាវុធ បង្កឲ្យមានមនុស្សរងរបួសនេះ ដើមហេតុដំបូងកើតឡើង មកពីបញ្ហាមិនចេះយោគយល់គ្នា ដោយជិះម៉ូតូអក់ស៊ឺគ្នា​បន្តិចបន្តួចប៉ុណ្ណោះ​។

 

ទោះបីជាពេលនេះ ជនបង្ករ បានជិះម៉ូតូរត់គេចខ្លួន ប៉ុន្តែ កម្លាំងនគរបាល នឹងតាមប្រមាញ់យកមកទទួលទោសអោយខានតែបាន ។

សូមបញ្ជាក់ថា កាលពីថ្ងៃកើតហេតុកម្លាំងនគរបាល អន្តរាគមន៍ខណ្ឌមានជ័យ បាន ដេញតាមប្រមាណ ៥០០ ទៅ៧០០ម៉ែត្រ ក៏ជនបង្ករូបនេះបានផ្ដួលម៉ូតូ រត់គេចខ្លួនបាត់។

 

គួររំលឹកផងដែរ បុរសរងគ្រោះ​ខាងមានឈ្មោះ ឡាយ សៀកឡេង អាយុ​៣២​ឆ្នាំ ស្នាក់​នៅផ្ទះ​លេខ​357 ផ្លូវជាតិ​លេខ​៥ ភូមិ​មិត្តភាព សង្កាត់​ឬ​ស្សី​កែវ ខណ្ឌ​ឬ​ស្សី​កែវ រាជធានីភ្នំពេញ។ រីឯ​ប្រពន្ធ​ និង​កូន​ ២​នាក់​ទៀត​ មិន​ស្គាល់​អត្តសញ្ញាណ​នោះទេ។

 

ដោយហេតុដើមបង្កអោយមានការផ្ទុះអាវុធនោះ មុនពេល​កើ​ត​ហេតុ គេ​ឃើ​ញ​បុរស​ជា​ជនរង​គ្រោះ​ បាន​ជិះ​ម៉ូតូ​មួយគ្រឿង ​ម៉ាកហុងដា​ស្កុប​ពី ពណ៌​ខៀវ ពាក់​ស្លាក​លេខ​ភ្នំពេញ1IV-5692 ដោយ​មាន​ដឹក​ប្រពន្ធ ​និង​កូន ​២​នាក់ ធ្វើ​ដំណើ​រ​តាម​បណ្ដោយ​ផ្លូវ ​៣៧១ ទិសដៅ​ពី​កើ​ត​មក​លិច ខណៈ​មក​ដល់​ស្តុប​ត្រង់ចំណុច​កើ​ត​ហេតុ​ ស្រាប់​តែមាន​បុរស​ម្នាក់​ជា​ជនដៃដល់ ជិះ​ម៉ូតូ​មួយគ្រឿង​ម៉ាក ហុងដា​ស្កុប​ពី ពណ៌​ស ពាក់​ស្លាក​លេខ​ភ្នំពេញ 1GU-9897 ធ្វើ​ដំណើ​រ​តាម​បណ្ដោយ​ផ្លូវ ​២១៧ ទិស​ដៅ​ពី​ត្បូង​ទៅ​ជើ​ង ​ក៏​ស្រាប់តែ​អក់ស៊ឺគ្នា​បន្តិច តែ​មិនបាន​បុក ឬ​ប៉ះគ្នា​នោះទេ។

 

ប្រភព​ដដែល ​បាន​បន្តថា ក្នុងអំឡុង​ពេលនោះ ​ក៏មាន​ការ​ប៉ះ​សម្ដី​គ្នា​បន្តិចបន្តួច​ផងដែរ ទើ​ប​ធ្វើ​ឲ្យ​ជន​ដៃដល់ដក​កាំ​ភ្លើង​ខ្លី បាញ់​ទៅ​លើជនរងគ្រោះទាំង​ប្រពន្ធ​កូន​ នៅក្បែរ​ចំនួន ​៣​គ្រាប់ ​បណ្តាល​ឲ្យត្រូវ​ចំនួន ​២​គ្រាប់ចំពោះ និង​ដៃ រងរបួស​យ៉ាងធ្ងន់ ត្រូវបានបញ្ជូនទៅកាន់មន្ទីរពេទ្យ។