បុរសម្នាក់ត្រូវខ្មាន់កាំភ្លើងបាញ់ជាច្រើនគ្រាប់ ខណៈកំពុងជិះម៉ូតូដឹកប្រពន្ធនិងកូនតូច

បុរសម្នាក់ត្រូវបានខ្មាន់កាំភ្លើងបាញ់ប្រហារជាច្រើនគ្រាប់បណ្តាលឱ្យរងរបួសយ៉ាងធ្ងន់ធ្ងរ វេលាម៉ោង២២យប់ ថ្ងៃទី១៦ ខែធ្នូ ឆ្នាំ២០២១ នៅចំណុចស្តុបអតីតស្ពានដែកចំការដូង តាមបណ្ដោយផ្លូវ៣៧១ កែងផ្លូវ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ បន្ទាប់ពីខ្លួនជិះម៉ូតូដឹកប្រពន្ធនិងកូនតូច២នាក់បំរ៉ុងប៉ះជាមួយម៉ូតូជនដៃដល់ បង្កជាទំនាស់ពាក្យសម្តី ឈានដល់មានការដកកាំភ្លើងបាញ់មកលើជនរងគ្រោះយ៉ាងសាហាវ ។

បុរសរងគ្រោះមានឈ្មោះ ឡាយ សៀកឡេង អាយុ៣២ឆ្នាំ ស្នាក់នៅផ្ទះលេខ357 ផ្លូវជាតិលេខ៥ ភូមិមិត្តភាព សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។ រីឯប្រពន្ធនិងកូន២នាក់ទៀតមិនស្គាល់អត្តសញ្ញាណនោះទេ ។

តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញបុរសជាជនរងគ្រោះបានជិះម៉ូតូមួយគ្រឿងម៉ាកហុងដាស្កុបពី ពណ៌ខៀវ ពាក់ស្លាកលេខភ្នំពេញ1IV-5692 ដោយមានដឹកប្រពន្ធនិងកូន២នាក់ ធ្វើដំណើរតាមបណ្ដោយផ្លូវ៣៧១ ទិសដៅពីកើតមកលិច ខណៈមកដល់ស្តុបត្រង់ចំណុចកើតហេតុ ស្រាប់តែមានបុរសម្នាក់ជាជនដៃដល់ ជិះម៉ូតូមួយគ្រឿងម៉ាក ហុងដាស្កុបពី ពណ៌ស ពាក់ស្លាកលេខភ្នំពេញ 1GU-9897 ធ្វើដំណើរតាមបណ្ដោយផ្លូវ២១៧ ទិសដៅពីត្បូងទៅជើងក៏ស្រាប់តែអក់ស៊ឺគ្នាបន្តិច តែមិនបានបុក ឬប៉ះគ្នានោះទេ
ក្នុងអំឡុងពេលនោះក៏មានការប៉ះសម្ដីគ្នាបន្តិចបន្តួចផងដែរ ទើបធ្វើឱ្យជនដៃដល់ដកកាំភ្លើងខ្លីបាញ់ទៅលើជនរងគ្រោះទាំងប្រពន្ធកូននៅក្បែរចំនួន៣គ្រាប់ បណ្តាលឱ្យត្រូវចំនួន២គ្រាប់ចំពោះ និងដៃ រងរបួសយ៉ាងធ្ងន់ធ្ងរ។

ន្ទាប់ពីបាញ់ហើយជនដៃដល់បានជិះម៉ូតូគេចចេញពីកន្លែងកើតហេតុដល់ផ្លូវបេតុង ក្នុងបុរីលឹមឈាងហាក់ នៃសង្កាត់ស្ទឹងមានជ័យទី៣ ខណ្ឌមានជ័យ ទើបទុកម៉ូតូចោលគេចខ្លួនបាត់ស្រមោល។ក្រោយកើតហេតុ ជនរងគ្រោះត្រូវបានរថយន្តសង្គ្រោះដឹងយកទៅសង្គ្រោះអាយុជីវិតភ្លាមៗ ផងដែរ ។ បន្ទាប់មកសមត្ថកិច្ចមូលដ្ឋាន និងផ្នែកជំនាញបានចុះមកប្រមូលវត្ថុតាងដែលពាក់ព័ន្ធទៅរក្សាទុក ដើម្បីធ្វើការស្រាវជ្រាវតាមចាប់ជនដៃដល់យកមកផ្ដន្ទាទោសតាមច្បាប់៕